人BLOG 我又BLOG

我自細就響老翻文化中長大

細個已經鍾意睇電視，最鍾意係睇 HE-MAN (骷髏頭堡賜我力量! 我係HE-MAN!  — 仲有冇人記得?)。亦希望得到 HE-MAN 玩具。

以前唔知屋企搵錢難，經常扭買玩具。尤記得有次阿媽同我講，會帶我去台灣買 HE-MAN，因為果度0的 HE-MAN 比較平。而家諗番起，係指老翻卦？

到大個少少，開始鍾意打機。第一部機唔係紅白，而係一部 TOMY 出0既遊戲機(應該冇人識的)。之後響表哥屋企玩灰機。灰機用大帶(即美版帶)，本身好似冇人專登出老翻的，但灰機可以加 ADAPTOR 玩細帶 (即日版帶)。

紅白時代的日版老翻帶是多姿多彩的，除左冇盒同埋張貼紙印得肉酸之外，基本上同正版帶冇分別。當年(83~86 年左右)香港人平均收入唔算多 (睇番0的舊書，新鮮人搵三千幾已經叫多，同宜家差得好遠)，但一餅紅白帶平極都要兩舊幾三舊水，大熱如 DQ4 0既可以炒到五舊水。莫講話當時，就算係宜家，有邊幾個會諗都唔諗磅五舊水去買一隻 GAME？於是乎，老翻細帶響香港持續暢銷。

到後來，老任 DISK SYSTEM (碟機)出現，令老翻變化更多。當時用0既碟係2.8吋細碟(老任由以前到宜家都鍾意自己制定制式呢…)，但最失敗0既係隻碟竟然係可讀寫。於是老翻生產商就自己生產寫碟機，可將 ROM 帶資料寫入2.8吋磁片；再生產所謂0既“博士系統“，令 DISK SYSTEM 變成 “ROM 帶模擬器“。於是用家只需將抄返黎0既碟放入碟機，就可以玩到 ROM 帶遊戲。記憶所及，一餅帶大約只用四隻磁片，每隻磁碟抄連碟十蚊，即係一隻 GAME 大約四十蚊 — 極端來講，和正版帶是十倍的分別，甚至比老翻細帶平一百蚊以上。而後來的 PCE, MD, SFC 甚至 N64, 都有有心人用類似方法模擬 ROM 帶，分別只係用0既媒體不同 — PCE, MD, SFC 時代用標準 FLOPPY，N64 則用 CD-ROM。至於大容量的遊戲如 MD-CD 和 PCE-CD 等，當時係無辦法模擬的，但香港人唔會覺得有咩損失的。

再直到近十年，CD-ROM 同 DVD-ROM 媒體出現，自製 CD-R 同 DVD-R 普及，寬頻上網速度越黎越快， 玩家甚至可以足不出戶自製老翻。就算係專賣老翻0既商店，都要執笠。講到呢度，大體都對遊戲界0既老翻有初步認知吧。 

我覺得香港人普遍對老翻少一份執著，主要原因，大概係香港人唔會因為老翻而影響經濟。老翻對電影業同唱片業影響最大，但就算佢0地大聲取締老翻，倒頭來其實又未至於影響前線人員0既生計 —- 演員拍片已經有片酬，票房可能只係影響 BONUS 0既多少。其實真正受影響0既人，可能只係佔成個社會人口不足1%。單純二分法計算，不受影響0既始終係多數。於是有一個共識，就係“用老翻先係明智之舉，你敢話你冇用過老翻？“。

我，唔係什麼藝人公眾人物，我冇必要隱瞞，我一定有用老翻，仲要用得幾頻密下。

但到有經濟能力時，就會開始想 TAKE 少少 RESPONSIBLE。自己0既興趣係打機，至少打機都盡量用番正版卦？其餘的，基本上我冇乜睇電影同聽音樂的…

奇怪0既係，我用正版軟件反而會受歧視，會有人覺得玩正版好怪。身邊經常有人問“點解你唔玩老翻呀？” “玩 ISO 仲好過玩 UMD 啦” “幾百蚊一隻GAME 點買呀？“

響香港呢個社會，從來都係經濟大過天的。阿公眼光獨到，香港人滿足到經濟就乜怨氣都冇。鄭大班就戇 99  0勒，好做唔做，阻住香港人發達，兩年後見佢唔到嫁0勒。