人BLOG 我又BLOG

呢間公司算係咁，每個員工每年都有一次身體檢查0既機會。

上個禮拜檢查完後，今日終於去睇報告。結果係一切正常，總算係安心。

醫生話我高密度膽固醇(即所謂好膽固醇)唔夠高，三脂甘油酸唔夠低，佢有以下建議

1) 每日最多食三兩肉，最好係雞胸肉，唔煎唔炸 — 番工帶飯盒的話可以考慮。

2) 每日最好有三兩魚食，深水魚為佳，魚生最好少食 — 基本上問題唔大，我番屋企食飯的話，一定有蒸魚食的。

3) 每日最好食一份Starch 裏面，有半份Unrefined Starch，說穿0左即係話糙米，麥皮，全麥麵包之類 — 呢個唯有靠朝早果兩塊麥包，可能食少少麥皮咁啦

4) 日行45 分鐘以上，要快行唔可以慢行 — 呢個有困難，我大汗，行到身水身汗唔掂。

5) 日飲一磅脫脂奶粉 — 死，真係冇咁0既習慣。普通牛奶就會飲。

6) 玩運動 — 呢個冇問題，我差唔多一個禮拜玩四日運動0既。

7) 每日三份水果 — 我大約每日一份左右啦…呢個諗下有冇辦法

8) 戒甜食 — 其實宜家我都戒0左好多甜食了，公司0的甜食我食完之後唔諗住再買。本來諗住買比佢食0既，但係佢應該今世都唔會再問我拎糖食。

結論係，做足以上八點，你有排都唔駛搵佢 — 不過你0既人生應 該會幾悶的。